Pilturinn sem lést í umferðarslysi á Snæfellsnesi um helgina hét Zachary Zabatta. Zabatta var staddur hér á landi í fríii ásamt fjölskyldu sinni þegar slysið varð. Slysið varð nærri bænum Gröf við Kleifá á sunnanverðu Snæfellsnesi en auk Zachary voru fjórir aðrir í bifreiðinni.
Fjallað er um málið á vefnum Patch.com, en þar segir að Zachary hafi stundað nám í gagnfræðaskóla í Manhasset. Systir Zachary, Sophia, slasaðist einnig alvarlega í slysinu.
Söfnun hefur verið hrundið af stað fyrir fjölskylduna á vefnum GoFundMe, en í frétt Patch kemur fram að allir hafi verið fluttir á spítala og óvíst sé hvenær fjölskyldan getur snúið aftur heim til Bandaríkjanna.
Zachary var nemandi við Saint Mary‘s-skólann og minntist skólinn hans á Facebook-síðu sinni í gær. Þar kom fram að Zachary hafi verið framúrskarandi nemandi og sorgin vegna slyssins sé mikil.
Svo virðist vera sem ökumaður bifreiðarinnar hafi missti stjórn á henni með þeim afleiðingum að bifreiðin fór út af veginum og valt nokkrar veltur og endaði á hliðinni. Hinir slösuðu voru fluttir með þyrlum og sjúkrabifreiðum af vettvangi.