Tveir karlmenn báðir ættaðir frá Albaníu, annar þó búsettur hér á landi, hafa verið ákærðir fyrir vopnaða árás gegn hvor öðrum. Samkvæmt ákæru átti atvikið sér stað á Barónsstíg í sumar, rétt hjá Austurbæjarskóla og Sundhöllinni.
Annar þeirra ber fyrir sig að hann hafi einungis verið að verjast atlög hins mannsins. Sá sem ekki er búsettur hér á landi er sakaður um að hafa reynt að stinga hinn með hníf en sá sem er búsettur hér náði að komast undan þeirri árás.
Sá sem er búsettur hér á landi er, þrátt fyrir að segjast hafa verið að verja sig, ákærður fyrir sérstaklega hættulega líkamsárás en hann er sakaður um að hafa slegið hinn manninn með hafnarboltakylfu í höfuðið. Af því hlaut maður heilahristing og langan skurð á mitt enni.
Sá sem ekki er búsettur hér á landi var á dögunum úrskurðaður í farbann. Í þeim dómi kom fram að upptaka væri til af atvikinu: „Þá kemur einnig fram í greinargerð sækjanda að myndbandsupptaka liggi fyrir í málinu þar sem sjá megi ákærða hlaupa með stóran eldhúshníf á móti manni sem hafi verið með hafnaboltakylfu í hendinni en sá hafi slegið ákærða. Á upptökunni megi sjá hvar ákærði reyni að stinga hinn manninn með hnífnum. Ákærði kveðst hafa gert þetta í sjálfsvörn.“
