Skiptar skoðanir eru um það hvort leyfa eigi starfsemi Uber hér á landi. Sigurður Ingi Jóhannsson, samgöngu- og sveitastjórnarráðherra, útilokaði það ekki í þættinum Reykjavík síðdegis í gær að Uber gæti hafið starfsemi hér á landi með nýrri löggjöf sem er nú þegar í smíðum.
Mikið hefur verið rætt um verð á leigubílum og sitt sýnist hverjum í þeim efnum. Neytendur hafa bent á að verðið sé allt of hátt en á móti hafa leigubílstjórar bent á að launin í greininni séu ekki ýkja há.
DV ræddi til dæmis við Einar Árnason, formann bílstjórafélagsins Fylkis, í maí síðastliðnum og sagði hann að verði væri stillt í hóf og það mætti varla við því að lækka. Kostnaðurinn sem leigubílstjórar þurfa að greiða sé það mikill að svigrúm til lækkana sé lítið sem ekkert.
Þeim sem hafa tekið leigubíl hér á landi hefur blöskrað verðið. Leikarinn og fjölmiðlamaðurinn Felix Bergsson gagnrýndi til dæmis hátt leigubílaverð á Twitter um helgina.
5000 kall fyrir taxa í 15-20 mín. Lol. Erum við fávitar að láta þetta viðgangast?
— Felix Bergsson (@FelixBergsson) October 6, 2019
Færsla Felix vakti talsverða athygli; margir tóku undir gagnrýnina með honum en aðrir voru á öndverðum meiði. Þingmaðurinn fyrrverandi, Nicole Leigh Mosty, borgaði ekki mikið þegar hún var í leigubíl í New York nýlega.
Var 52 mín í leigubíll í NYC nýlega… greiddi 28 dollara með tips!
— Nichole Leigh Mosty (@nicholeleigh19) October 6, 2019
Skemmtikrafturinn Sóli Hólm sagðist einnig hafa greitt 1.500 krónur fyrir leigubíl frá Hótel Sögu og á Hringbraut.
Borgaði 1500 fyrir taxa frá Hótel Sögu og heim á Hringbraut. Ca. 90 sekúndna akstur.
— Sóli Hólm (@SoliHolm) October 6, 2019
Svo voru aðrir sem bentu á að leigubílstjórastéttin hér á landi verði seint talin hátekjustétt.
Ekki heldur fólk hér í alvöru að leigubílstjórar séu hátekjufólk.. Hvað er leikarinn Felix með á tímann sem verktaki?
— Jon Steinsson (@Iceanon) October 6, 2019
Ég hef verid leigubílstjóri í 9 ár, medaltímakaupid er ca 2800-3000kr af því borga ég skatt, leigubílstjórar keyra allskonar fólki, í allskonar ástandi…og þurfa þar af leidandi ad þola ýmislegt… er sanngjarnt ad rádast á þessi laun?
— stigur berg sophusso (@StigurS) October 6, 2019
Felix var svo bent á að svona orðbragð væri engum til framdráttar. Felix dró í land en segist einfaldlega hafa blöskrað.
Point taken. Skal vanda mig í framtíðinni. En mér bara blöskraði. það er eitthvað mikið að í þessum efnum. Verðin eru fáránleg
— Felix Bergsson (@FelixBergsson) October 6, 2019
Fjölmiðlamaðurinn Egill Helgason fjallaði um málið á bloggsíðu sinni á Eyjunni í gærkvöldi þar sem hann sagði að frumvarp um leyfi Uber gæti orðið eldfimt. Egill nefndi síðan kosti og galla þjónustunnar.
„Uber hefur sína kosti. Þetta er þægileg þjónusta og ekki sérlega dýr. Ég hef notað hana talsvert í Bandaríkjunum og þá reyndar frekar Lyft – sem hefur betra orð á sér en Uber. Maður pantar í gegnum síma, greiðir með honum, og manni er skilað beint upp að dyrum. Það er líka ágætt að geta séð fyrirfram hvernig bíl maður getur átt von á og umsagnir sem bílstjórinn fær.
Leigubílar á Íslandi eru dýrir – og maður getur stundum þurft að bíða óþægilega lengi eftir þeim.
En gallarnir eru ófáir, enda hefur starfsemi Uber verið bönnuð víða. Þetta snýst ekki síst um ábyrgð farveitunnar sjálfrar – hún er ekkert nema milliliður, vefsíða og app, og reynir að komast upp með að taka eins litla ábyrgð og hægt getur. Mestallt slíkt lendir á bílstjórunum sjálfum sem eiga bílana og reka þá.
Bílstjórarnir hjá Uber eru líka afar illa launaðir, njóta lítilla réttinda, á meðan fyrirtækið er metið á milljarða dollara á hlutabréfamarkaði.“
Þorsteinn Sæmundsson, þingmaður Miðflokksins, tjáði sig um málið á Facebook-síðu Egils í gærkvöldi og þar sagðist hann alfarið vera á móti því að Uber verði leyft á Íslandi.
„Algerlega á móti. S.k. deilihagkerfi er fínna orð yfir skattsvik. Erfitt að fylgjast með öryggisatriðum, tryggingum, ökuréttindum bílstjóra o.s.frv. Svo er galið að borga ca. 30% umboðslaun til Uber/USA í beinhörðum gjaldeyri.“
Hvað segja lesendur, á að leyfa starfsemi Uber á Íslandi?
