Tveir af þeim sem sótt hafa um starf seðlabankastjóra hafa kvartað vegna skipunar Sigríðar Benediktsdóttur í hæfisnefnd sem á meta hæfi umsækjenda um starf seðlabankastjóra. Sigríður, sem er hagfræðingur við Yale-háskóla, er formaður nefndarinnar en gagnrýnin beinist að því að hún situr á sama tíma í bankaráði Landsbankans.
Frá þessu er greint í Markaðnum og á forsíðu Fréttablaðsins í dag.
Gagnrýnin er sögð beinast að þeirri staðreynd að Landsbankinn, stærsti viðskiptavinur Seðlabankans, á verulegra hagsmuna að gæta vegna ýmissa ákvarðana Seðlabankans. Því skjóti það skökku við að Sigríður fari fyrir nefnd sem hefur mikið um það að segja hver verður næsti seðlabankastjóri.
Fullyrt er að annar þeirra sem lagt hefur fram kvörtun sé Sturla Pálsson, framkvæmdastjóri markaðsviðskipta og fjárstýringar Seðlabankans. Lögum samkvæmt má ekki kjósa stjórnendur eða starfsmenn fjármálastofnana til setu í bankaráði. Telja þeir umsækjendur sem hafa kvartað að sama ætti að vera uppi á teningnum þegar kemur að því að skipa í hæfisnefnd um stöðu seðlabankastjóra.
Þá hefur Markaðurinn heimildir fyrir því að óánægja sé með það í Landsbankanum að Sigríður hafi tekið sæti í hæfisnefndinni án þess að bera það undir formann bankaráðs eða regluvörð Landsbankans.