Líkt og DV greindi frá í gær þá var athafna- og fjölmiðlamaðurinn Sigmar Vilhjálmsson, eða Simmi Vill eins og hann er yfirleitt kallaður, ekki sáttur við uppátæki Hatara á laugardaginn, en hljómsveitarmeðlimir veifuðu palenstínskum fánum. Hann gagnrýndi þetta á Twitter og hlaut talsverðar skammir fyrir.

Sjá einnig: Simmi ósáttur við Hatara

Hann hélt þó áfram að tísta inn í nóttina og sagðist að lokum sjá eftir orðum sínum. Fyrst um sinn blöskraði honum viðbrögðin sem tístið hans fékk. „Getur einhver látið mig vita þegar góða fólkið er búið að fá alla sína útrás á síðasta tísti mínu. Magnað hvað frjálslyndafólkið reynist í raun fordómafyllst þegar öllu er á botninn hvolft,“ skrifaði Sigmar og bauð góða nótt.

Um tveimur tímum síðar skrifaði hann nýtt tíst eftir andvökunótt. „Ég gat ekki sofnað. Sé eftir því að hafa fundist Palestínu fánanum ofaukið. Sé eftir því og finnst það ekki lengur. Þetta var bara ótrúlega flott að sjá okkar fólk senda sterk skilaboð til heimsins. Takk fyrir góð rök og hvetjandi skilaboð sem opnuðu augu mín,“ skrifaði Sigmar og lækuðu það fjölmargir.

Í gær birti hann svo stutt myndband, en af því að dæma hafði hann aftur sveiflast í átt að því að vera á móti uppátækinu.

Sonur minn er ekki sammála mér í stóra fánamálinu. #HatriðMunSigra #12stig pic.twitter.com/Lr3ibOm7SU

— Simmi Vil (@simmivil) May 19, 2019