En þetta getur líka verið sá tími þar sem fólk fer yfir strikið, drekkur til dæmis of mikið og gerir hugsanlega eitthvað sem getur orðið til þess að það missir vinnuna.
SEEK er ástralskur atvinnuleitarmiðill, svipaður og Alfreð á Íslandi, og birti nýverið grein um hvað skal hafa í huga fyrir jólahlaðborðin, svo maður missi nú ekki vinnuna og endi á að skoða atvinnuauglýsingar fyrir áramót.
Þó svo að viðburðurinn sé ekki haldinn á vinnustaðnum sjálfum eða vinnutíma þá ertu samt í vinnuumhverfi.
„Það þýðir að þú þarft að vera meðvitaður um að haga þér alveg eins og þú myndir gera í vinnunni,“ segir sérfræðingur SEEK, Miranda Doessel.
Vinnupartý eru ekki besti tíminn til að deila öfgakenndum skoðunum eða byrja að deila við einhvern.
„Þetta er frábært tækifæri til að tengjast samstarfsfélögum betur, en ekki gleyma því að samtöl eiga samt að vera fagleg,“ segir Miranda.
Hún segir að ef fólk er ekki með það á hreinu hvað sé í lagi að tala um og hvað ekki þá hvetur hún það til að fylgjast með um hvað aðrir eru að tala.
Það er oft mikið um slúður og þess háttar í vinnupartýjum en Miranda hvetur fólk til að forðast slíkt.
Þú vilt ekki gera eitthvað sem lætur fólk slúðra um þig, en þú ættir líka að forðast að slúðra um aðra og dreifa kjaftasögum.
Miranda segir að það sé góð þumalputtaregla að „ef þér þætti í lagi að einhver myndi taka upp samtalið ykkar og deila því á netinu með nafninu þínu, þá er þetta líklegast í lagi.“
Vertu búinn að ákveða hvað þú ætlar að drekka mikið og haltu þig við það.
„Hver manneskja ætti að þekkja eigin mörk,“ segir Miranda.
