Andriy Yermak, nánasti samstarfsmaður Volodymyr Zelensky forseta, sagði starfi sínu sem starfsmannastjóri skrifstofu forsetaembættisins, lausu í gær eftir að sjálfstæðar úkraínskar stofnanir um spillingaeftirlit gerðu húsleit heima hjá honum í tengslum við umfangsmiklar rannsóknir.

Húsleitirnar eru taldar tengjast rannsóknum á spillingu varðandi uppbyggingu orkuinnviða sem staðið hafa yfir undanfarnar vikur og þegar kostað tvo ráðherra embætti sín.

Það að Yermak flæktist inn í málið hefði ekki getað komið á verri tíma fyrir Zelensky því þessi bandamaður hans stýrði sendinefnd Úkraínu sem vinnur að lausn í friðarviðræðum við Rússa sem Bandaríkjamenn stýra.

Yermak tjáði sig loks um málið í gærkvöldi og fór mikinn. Í umfjöllun New York Post kemur fram að í torræðum skilaboðum virðist hann ætla að fara út á vígvöllinn.

„Ég ætla í fremstu víglínu og er tilbúinn öllum hefndaraðgerðum,“ sagði Yermak og lýsti yfir vonbrigðum sínum með að njóta ekki stuðnings og trausts.

„Ég er heiðvirð og góð manneskja. Ég er búinn að þjóna Úkraínu vel og vera í Kiev frá því að innrás Rússa hófst. Ég hef óbeit á þeim viðbjóði sem beinist gegn mér og enn meiri óbeit á stuðningsleysi þeirra sem vita sannleikann“ sagði Yermak enn fremur.

Þá sagðist hann ekki vilja valda Zelensky frekari vandræðum og því væri vígvöllurinn svarið.