Máni, 11 ára hundur af labradorkyni, hefur verið týndur í sólarhring. Hans er sárt saknað af eigendum.

Mána var hleypt út um 16:00 í gær til að pissa og hefur sloppið úr bakgarðinum sínum í 108 Reykjavík, Háaleitis- og Bústaðahverfi. Eigandi hans sagði í samtali við blaðamann að hann gæti hafa farið í Elliðárdalinn, þar sem hann fær oft að hlaupa.

Máni er orðinn 11 ára gamall og þjáist af elliglöpum og skertri heyrn. Því telur eigandi að það sé mögulegt að hann hafi orðið áttavilltur og rati ekki heim til sín. Veðrið var ekki með besta móti í nótt.

„Hann hefur alltaf skilað sér heim, en nú er liðinn sólarhringur og við höfum ekkert heyrt. Það höfðu tveir samband sem héldu að þeir hefðu séð hann í Árbæ, en hann fannst samt ekki. Ég hringdi í hundaeftirlitið og lögregluna, en við höfum ekki  heyrt neitt. Maður hjá hundaeftirlitinu taldi mjög ólíklegt að hann væri enn á vappi, hann hlyti að hafa komið sér í skjól. Það gæti verið að einhver hafi tekið hann inn til sín og sé ekki með Facebook og viti ekki hvað hann á að gera.“

Máni svarar innkalli, en hann er þó orðinn heyrnadapur. Hann er að sögn eiganda blíður og góður og ekki hræddur við neinn.

Þeir sem verða varir við Mána er bent á að hafa samband við Lögregluna á Höfuðborgarsvæðinu í síma: 444-1000