Hagfræðideild Landsbankans spáir því að verðbólga fari úr 2,9 prósentum í 3,2 prósent í apríl. Spáir deildin því að þar muni vega þungt hækkun fluggjalda í mánuðinum.
„Við gerum ráð fyrir 20% hækkun á flugfargjöldum til útlanda. Þróun flugfargjalda til útlanda í mars og apríl fer að mjög miklu leyti eftir því í hvorum mánuði páskarnir lenda. Páskarnir eru mikill ferðatími og eftirspurn og verð eftir flugi því hærra,“ segir í greiningu deildarinnar sem birt var í morgun.
Bent er á það að árin 2015, 2016 og 2018 hafi páskar fallið í lok mars/byrjun apríl og þá hafi verið óveruleg breyting á þessum lið milli sömu mánaða.
„2017 voru páskar vikuna eftir verðkönnunarvikuna og hækkuðu flugfargjöld til útlanda þá um tæp 15%. Í ár eru páskar tveimur vikum á eftir verðkönnunarviku Hagstofunnar sem skýrir þessa hækkun,“ segir hagfræðideild Landsbankans.
Þá segir deildin að samkvæmt verðkönnun sem gerð var hafi verð á bensíni og díselolíu hækkað um 2,3% milli mánaða. Þá er búist við smávægilegri hækkun á reiknaðri húsaleigu. Það sem vegur á móti þessu, að líkindum, er verð á matarkörfunni sem lækkar vegna gengisáhrifa.
Í skýrslu hagfræðideildar kemur fram að talsverð óvissa ríki um áhrif falls WOW á flugfargjöld til útlanda.
„Síðustu ár hefur Hagstofan byggt verðmælingar sínar á flugi til útlanda á verði farmiða hjá Icelandair og WOW air. Hlutdeild WOW air var um þriðjungur af vísitölunni. Flugfargjöld eru tekin inn í vísitöluna mánuðinn sem flugið er flogið, en ekki mánuðinn sem flugið er keypt. Alla jafna hefði flug sem keypt var í febrúar og mars og flogið hefði í apríl átt að koma inn í vísitöluna núna. Hagstofan er í þeirri mjög svo sérstöku stöðu að vera með verðmælingar á flugi sem ekki verður flogið vegna gjaldþrots WOW air. Það er alls óvíst hvernig Hagstofan mun snúa sér í þessu og þá hvort að einungis verði miðað við verð á keyptum flugmiðum af Icelandair. Flugfargjöld til útlanda hafa lækkað mikið síðustu ár. Þannig var að meðaltali 12,8% ódýrara að fljúga til útlanda 2018 en 2017 og 15,5% ódýrara 2017 en 2016. Við eigum von á að þessi þróun gangi til baka á þessu ári sökum minna framboðs og minni samkeppni í kjölfar gjaldþrots WOW air en einnig vegna hækkunar olíuverðs.“