Stjórnskipunar- og eftirlitsnefnd Alþingis ætlar að óska eftir frekari upplýsingum frá Ríkisendurskoðun um Útlendingastofnun. Helga Vala Helgadóttir, formaður nefndarinnar, segir að þegar Ríkisendurskoðun kynnti nefndinni skýrslu um Útlendingastofnun hafi fleiri spurningar vaknað sem verða sendar til Ríkisendurskoðunar sem muni svara þeim á næstu vikum.

Fréttablaðið skýrir frá þessu í dag. Haft er eftir Helgu Völu að þegar þessar upplýsingar liggi fyrir muni fulltrúar Útlendingastofnunar verða kallaðir til fundar með nefndinni sem muni í kjölfarið taka afstöðu til hvort hægt er að ljúka umfjöllun um stofnunina eða hvort hún telji þörf á að bregðast við.

Í skýrslu Ríkisendurskoðunar er meðal annars fjallað um starfsmannamál Útlendingastofnunar en starfsmannafjöldinn hefur þrefaldast á tæpum áratug. Meðal nýrra starfsmanna er fólk með litla reynslu sem var ráðið í tengslum við átaksverkefni stjórnvalda gegn atvinnuleysi. Í skýrslunni er sett fram gagnrýni á að starfsfólk hafi engar verklagsreglur til að starfa eftir en slíkar reglur gætu stuðlað að faglegri vinnubrögðum.