Í dag, fimmtudaginn 26. apríl 2018, setur Carl XVI Gustaf konungur Svíþjóðar met en hann hefur nú setið á konungsstóli í 44 ár og 223 daga. Þar með hefur hann setið lengst allra á konungsstóli, og eru drottningar þá einnig taldar með, í þúsund ára sögu Svíþjóðar. Fyrra metið var frá fjórtándu öld en þá sat Magnus Eriksson á konungsstóli frá 1319 (þegar hann var þriggja ára) þar til 1364 eða í 44 ár og 222 daga.

Langlífi er þekkt í fjölskyldu Carl XVI Gustaf en afi hans og langafi komust báðir á tíræðisaldur. En það má kannski teljast merkilegra met hjá Magnus Eriksson að hafa setið á konungsstóli í 44 ár og 222 daga því á hans tíma var mikill óróleiki í samfélaginu og ástandið oft hættulegt auk þess sem læknisfræðin hafði ekki náð mjög langt.

Carl XVI Gustaf á þó enn langt í land með að ná Elísabetu II Bretadrottningu sem hefur nú setið á drottningarstólnum og ríkt í heil 65 ár.