Norðmaðurinn Svein Jemtland, var í morgun dæmdur í 18 ára fangelsi í Héraðsdómi Heiðmerkur í Hamar fyrir morðið á Janne Jemtland, eiginkonu sinni, sem var myrt 29. desember í fyrra. Greint er frá þessu á vef NRK.
Málið vakti gríðarlega athygli í Noregi. Hvarfið olli íbúum Brumunddal hugarangri, en íbúar í þessum litla bæ, rúma hundrað kílómetra norður af Osló, eru rétt um tíu þúsund talsins.
Sjá einnig: Eiginmaður Janne Jemtland handtekinn
Svein tilkynnti um hvarf Janne og fannst hún ekki fyrr en 13. janúar, þá á botni árinnar Glomma með bílrafhlöður bundnar við líkið og skotsár á höfði.
Hjónin höfðu verið í veislu í félagsheimili í Velrom, í um átta kílómetra fjarlægð frá heimili sínu kvöldið 29.desember og tóku leigubíl heim um skömmu fyrir klukkan tvö eftir miðnætti. Annar sonur hjónanna segist hafa heyrt hávaða fyrir utan húsið kl. 2:15.. Þegar hann heyrði hávaðann mun hann hafa sent móður sinni SMS-skilaboðin: „Mamma?!“.
Byssan sem Svein notaði var af gerðinni Makarov, henni var stolið í Tékklandi árið 2007. Byssan fannst í skóglendi í Vangsåsa í Hamar í maí. Svein var í frönsku útlendingahersveitinni í rúma tvo áratugi og gegndi herþjónustu meðal annars á Balkanskaga á tíunda áratugnum. Árið 1991 var hann dæmdur í fimm mánaða fangelsi fyrir líkamsárás. Hann og Janne gengu í hjónaband árið 2006.
