Eiginmaður Janne Jemtland, norsku konunnar sem ekkert hefur spurst til síðan 29. desember, hefur verið handtekinn vegna gruns um aðild að hvarfi hennar og hafa orðið henni að bana. Norska lögreglan handtók hann í kvöld, að því er norskir fjölmiðlar greina frá, en þrátt fyrir það hefur lík Janne ekki fundist.
Lögreglan framkvæmdi rannsókn á húsi Janne og eiginmanns hennar í Brumunddal í dag og í kjölfarið var ákveðið að handtaka eiginmann hennar. Svo virðist vera sem lögregla hafi fundið eitthvað á heimili þeirra, en hvað það var hefur ekki verið gefið upp.
Hvarf Janne hefur vakið mikla athygli í Noregi, en hún hvarf aðfaranótt 29. desember eftir að hafa verið í jólaboði með eiginmanni sínum og vinum. Blóð úr henni fannst á tveimur stöðum stuttu síðar, en þrátt fyrir mikla og ítarlega leit hefur hún ekki fundist. Brumunddal er lítill bær, mitt á milli Hamars og Lillehammer, norðvestur af höfuðborginni Osló.
Julie Dalsveen, fulltrúi lögreglu, sagði á blaðamannafundi í kvöld að lögregla teldi sig hafa rökstuddan grun um að eiginmaður Janne hafi verið viðriðinn hvarfið. Lögregla vonast til að yfirheyra hann í kvöld og verður að líkindum farið fram á gæsluvarðhald yfir honum á mánudag.
Lögregla hefur fengið yfir 200 vísbendingar vegna málsins á undanförnum dögum. Sem fyrr segir var framkvæmd ítarleg húsleit á landareign hjónanna; lagði lögregla meðal annars hald á tvo bíla í eigu þeirra.