Hæstiréttur hefur staðfest dóm Héraðsdóms Norðurlands eystra þess efnis að Stapi lífeyrissjóður þurfi að greiða Kára Arnóri Kárasyni, fyrrverandi framkvæmdastjóra sjóðsins, 23,6 milljónir króna. Kári hætti störfum hjá sjóðnum í kjölfar afhjúpunar um Panamaskjölin á vormánuðum 2016.
Nafn Kára kom upp í tengslum við umfjöllun um skjölin en hann hætti í kjölfar símtals frá Kastljósi þar sem honum var tjáð að nafn hans væri að finna í skjölunum frá lögfræðiskrifstofunni Mossack Fonseca.
Í málinu var uppi ágreiningur um það hvort Kári ætti rétt til greiðslu launa um tólf mánaða skeið eftir starfslok. Forsvarsmenn Stapa sögðust líta svo á að Kári hefði framið alvarlegt trúnaðarbrot og því hafi sjóðnum verið heimilt að rifta ráðningarsamningnum án fyrirvara.
Þetta taldi Kári ekki standast lög. Um hafi verið að ræða félög erlendis sem hann hafi átt hlut í að stofna löngu áður en hann var ráðinn til starfa hjá sjóðnum árið 2007.
Í dómi Hæstaréttar er Stapa gert að greiða Kára Arnóri eina milljón króna í málskostnað fyrir Hæstarétti, auk þeirra tveggja milljóna sem lífeyrissjóðurinn var dæmdur til að greiða Kára í málskostnað í héraði.
