Birgir Hauksson veiddi óvenjulegt dýr á Reykjanesi í gær en um var að ræða þvottabjörn sem hafðist við í holu skammt frá Höfnum. Birgir tjáði sig um hina óvenjulegu veiði í samtali við Rúv.
„Hann rakst á þetta hundurinn. Ég hélt bara að hann væri búinn að finna mink eins og hann gerir oft, en svo komu allt önnur hljóð úr holunni þegar ég fór að kanna málið.“
Segir Birgir að hundurinn Tyson og þvottabjörninn hafi tekist á en hann sjálfur svo gripið inn í. Ekki er vitað hvernig þvottabjörninn komst til landsins. Líklegast er að honum hafi verið smyglað eða dýrið gerst laumufarþegi. Stutt er síðan að DV rifjaði upp sögu Sædýrasafnins en í þeirri umfjöllun var greint frá því þegar þvottabjörn var drepinn í Lýsi og mjöli árið 1976.
Kristinn Haukur Skarphéðinsson dýravistfræðingur sagði í kvöldfréttum RÚV að þvottabjörninn sem var drepinn á Reykjanesi ekki vera hættulegan.
„Nei, þetta er rándýr og myndi verjast ef það væri á það sótt, en þetta eru frekar glaðlynd og góðleg rándýr,“ sagði Kristinn. Þvottabirnir eru alætur og geta virst illvígir séu þeir hræddir. Þeir eru þó í flestum tilvikum sárameinlausir.