Mikill vatnselgur er á götum á höfuðborgarsvæðinu. Slökkvilið, björgunarsveitir og sveitarfélög eru að vinna í að losa um vatnið, hreinsa frá niðurföllum og dæla vatni burt, en það tekur tíma. Þetta kemur fram í skeyti frá lögreglu.
Yfirvöld biðja ökumenn að fara gætilega en margir hafa lent í því að drepist hefur á ökutækjum þegar þeir hafa ekið í gegnum djúpt vatn sem hefur safnast saman á götum borgarinnar. Það skapar vandamál.
Á vef mbl.is segir að versta staðan sé nú hjá umferðargöngum undir Reykjanesbraut skammt frá Smáralind.
„Þau eru lokuð núna og þar er algjör elgur í augnablikinu,“ segir Sigríður Tómasdóttir upplýsingafulltrúi Kópavogsbæjar og bætir við að ekki liggi fyrir hve hratt gangi að losa vatnið.
Þá hefur stór pollur myndast á Breiðholtsbraut og í Mosfellsbæ er verið að losa niðurföll.
— Hreiðar Ingi Eðvarðs (@Hreidar_I) February 21, 2018
