Sérfræðingar Veðurstofu Íslands funduðu í morgun með fulltrúum Almannavarnadeildar Ríkislögreglustjóra. Farið var yfir stöðu og þróun mála Jökulsár á Fjöllum en rafleiðni þar hefur aukist undanfarnar vikur og hefur áin verið mórauð.

Í tilkynningu sem Veðurstofan sendi frá sér í morgun kemur fram að ekki sé mikil breyting á rafleiðni frá því í gær, en nýjustu mælingar sýni sömu leitni og undanfarnar tvær vikur.

Upptök vatnsins eru enn óljós og þarf nánari greiningu gagna og vettvangsferð á svæðið. Í framhaldinu var ákveðið að greina þau gögn sem eru til staðar, til dæmis vatnamælagögn, gervitunglamyndir, skjálftagögn, óróagögn og fleira. Ekki er líklegt að það verði flogið yfir svæðið í dag vegna veðurs, en vonast er til að hægt verið að fara á vettvang sem fyrst.

Í Fréttablaðinu í dag segir Ármann Höskuldsson eldfjallafræðingur að tvenn hugsanleg upptök gæti verið að ræða, í Bárðarbungu eða Kverkfjöllum. Ef upptökin væru í Bárðarbungu væri hlaupið að líkindum stærra. Ef þetta komi úr Kverkfjöllum þá sé líklega um hefðbundið gengissig að ræða.

„Ef þetta er að koma úr Bárðarbungu getur þetta verið undanfari meiri viðburða,“ segir Ármann sem tekur fram að ómögulegt sé að segja til um það fyrr en flogið verður yfir svæðið.