Þrátt fyrir neitun liggja fyrir gögn sem benda til sektar
„Tölur sýna að þegar um alvarleg ofbeldisbrot eða manndráp er að ræða er játning yfirleitt ekki vandamálið á Grænlandi. En hann gæti verið í fullkominni afneitun,“ segir Helgi Gunnlaugsson afbrotafræðingur í samtali við Morgunblaðið í dag.
Segir Helgi að í samtölum hans við grænlenska afbrotafræðinga hafi hann orðið þess áskynja að óvenjulegt sé meðal Grænlendinga að játa ekki sök.
Aðalmeðferð í máli Thomasar, sem er ákærður fyrir morðið á Birnu Brjánsdóttur, hófst í Héraðsdómi Reykjaness í gær og heldur aðalmeðferðin áfram í dag.
Í umfjöllun um málið í Morgunblaðinu segir Helgi að Thomas hafi komið fram með nýjar útgáfur eftir því sem málinu hefur undið fram. „Hann sendir frá sér þau skilaboð að vitnisburður hans sé algjörlega haldlaus og ekkert mark sé á honum takandi,“ segir Helgi sem bætir við að ekki sé óalgengt að sakborningar komi með nokkrar útgáfur af því sem á að hafa gerst.
Helgi segir að þrátt fyrir neitun Thomasar liggi fyrir gögn sem benda til sektar Thomasar, til dæmis niðurstöður blóð- og lífsýna.