Mannleg mistök eða þaulskipulagður verknaður
Bandaríski sjóherinn vinnur nú að rannsókn á því hvað fór úrskeiðis þegar herskipið USS John McCain sigldi á kaupskip skammt frá Singapúr um helgina. Tíu bandarískir sjóliðar létust og fimm slösuðust í árekstrinum.
Ýmsum kenningum hefur verið varpað fram um hvað fór úrskeiðis. Líklegasta skýringin er sú að mannleg mistök hafi valdið slysinu og þá er ekki útilokað að galli í siglingabúnaði hafi valdið því. Þriðja kenningin er athyglisverð en hún er á þá leið að tölvuhakkarar hafi valdið árekstrinum.
John Richardsson, flotaforingi í bandaríska sjóhernum, sagði á Twitter að enn sem komið er benti ekkert til þess að um tölvuárás hafi verið að ræða. Hann tók þó skýrt fram að sá möguleiki væri ekki útilokaður.
Undanfarnar vikur hefur hvert áfallið rekið annað hjá sjóhernum. Um miðjan júnímánuð rakst tundurspillirinn USS Fitzgerald á gámaflutningaskip undan vesturströnd Japans. Sjö skipverjar létust í árekstrinum og um helgina létust tíu í hinu slysinu. Hefur þeirri kenningu verið varpað fram að ekki sé um tilviljun að ræða og mögulega hafi verið átt við GPS-staðsetningarbúnað skipanna.
Kyle Mizokami, dálkahöfundur hjá Popular Mechanics, segir að ólíklegt sé að átt hafi verið við GPS-búnaðinn. Slíkar árásir hefðu haft víðtækari áhrif og áhrif á fleiri skip í nágrenni við áreksturinn. Ekkert bendi til þess að svo hafi verið. Þess utan reiði sjóherinn sig ekki einvörðungu á GPS-staðsetningarbúnað.
„Það er eitthvað meira í gangi en bara mannleg mistök,“ segir fyrrverandi sérfræðingur hjá bandaríska sjóhernum í samtali við fréttavefinn McClatchy. Bent er á það að þann 22. júní, skömmu eftir árekstur USS Fitzgerald, hafi tölvuhakkarar átt við GPS-sendingar á Svartahafi sem höfðu áhrif á alls tuttugu skip. Staðsetningarbúnaður skipanna gaf til kynna að þau væru á landi en ekki á sjó.
Þá segist fyrrverandi fulltrúi í netglæpadeild ísraelska yfirvalda ekki trúa á tilviljanir í þessum efnum. Hann segir að tölvuhakkarar geti beitt ýmsum brögðum til að eiga við búnað skipa. Þannig geti þeir átt við GPS-búnað en einnig átt við siglingabúnað skipa og komið fyrir óværu í hugbúnaði þeirra.
„Kínverjar geta þetta. Kannski eru þeir að prófa hluti, það er möguleiki,“ segir fulltrúinn fyrrverandi í samtali við news.com.au
