Maðurinn sem lést eftir líkamsárás í Mosfellsdal í gærkvöldi hét Arnar Jónsson Aspar. Arnar var fæddur árið 1978 og lætur meðal annars eftir sig tvær dætur. Þetta kemur fram í umfjöllun mbl.is um málið í dag. Þar er rætt við Klöru Ólöfu Sigurðardóttur, móðursystur Heiðdísar Helgu Aðalsteinsdóttur konu Arnars.

„Hún horfði upp á þessa árás og er í miklu áfalli,“ segir Klara Ólöf við vef Morgunblaðsins. Hún veitti DV góðfúslegt leyfi til að birta nafn og mynd af Arnari með þessari umfjöllun.

Í umfjöllun Morgunblaðsins kemur fram að tíu daga gömul dóttir Arnars og Heiðdísar hafi verið sofandi í gærkvöldi þegar hópur fólks knúði dyra og réðist á Arnar með þeim afleiðingum að hann lést. Afi barnsmóður Arnars var í mat hjá fjölskyldunni og varð hann vitni að árásinni. Hann fékk fyrir hjartað í kjölfarið og var fluttur með sjúkrabíl á sjúkrahús þar sem hann dvelur enn.

Að sögn Klöru reyndi Heiðdís að fá árásarmennina til að hætta, meðal annars með því að minna þá á að Arnar ætti nýfædda stúlku og fjölskyldu. Að sögn Mbl.is búa foreldrar Arnars í næsta húsi og hljóp Arnar frá heimili sínu þegar hann sá í hvað stefndi. „Hann varði fjölskylduna sína,“ segir Klara. Unga stúlkan er fyrsta barn Arnars og Heiðdísar en Arnar átti fyrir eldri stúlku sem var ekki heima þegar árásin átti sér stað.

Hér má lesa umfjöllun mbl.is í heild sinni.