Dómsuppsaga í máli sérstaks saksóknara gegn Hannesi Smárasyni var lesin upp í Hæstarétti Íslands í morgun. Niðurstaðan var sú að málið var látið niður falla en áður hafði Hannes verið sýknaður af ákæru um fjárdrátt í Héraðsdómi í febrúar í fyrra. Megin ástæðu niðurfellingarinnar má rekja til þess að málið tók alltof langan tíma.
Hannes var ákærður fyrir að hafa 25. apríl 2005 fært nær 2,8 milljarða króna af reikningi FL Group og inn á sérstakan reikning KB banka í Lúxemborg án vitundar og samþykkis stjórnar FL Group. Hannes var þá stjórnarformaður FL Group. Sérstakur saksóknari taldi hæfilegt að Hannes fengi tvö til þrjú ár í fangelsi.
Í dómi Hæstaréttar í dag var rakið að þegar málsgögnin bárust Hæstarétti hefðu verið liðin meira en ellefu ár frá ætluðu broti, nærri átta ár frá upphafi rannsóknar og rúmir sautján mánuðir frá því að ríkissaksóknari gaf út áfrýjunarstefnu til að fá hnekkt héraðsdómi um sýknu Hannesar. Allur sakarkostnaður greiðist úr ríkissjóði, þar með talin 9.958.905 króna málsvarnarlaun Gísla Guðna Hall hæstaréttarlögmanns. Þá skal ríkissjóður greiða 19.384 evru og 413.655 krónur vegna útlagðs sakarkostnaðar verjandans.
