Rúmlega fimmtíu þúsund fluttu frá Svíþjóð á síðasta ári
Tæplega fimmtíu og sex þúsund manns fluttu frá Svíþjóð á síðasta ári. Aldrei áður í sögu Svíþjóðar hafa jafn margir flutt frá landinu.
Dagens Nyheter fjallar um þetta og bendir á að þetta sé meiri fjöldi en metárið 1887 þegar 50.786 fluttu frá Svíþjóð. Þá fluttu flestir til Vesturheims í leit að betra lífi líkt og gerðist á Íslandi á sínum tíma.
Það sem vegur á móti er hins vegar sú staðreynd að íbúafjöldi Svíþjóðar á þeim tíma var mun minni en hann er í dag. Árið 1887 voru Svíar 4,73 milljónir en eru í dag 9,85 milljónir.
Í frétt Dagens Nyheter kemur fram að ástæðan fyrir þessum mikla fjölda brottfluttra á síðasta ári sé sú að margir, sem eiga rætur sínar að rekja til annarra landa, ákváðu að flytja heim á síðasta ári. Þannig fæddust 24 prósent þeirra 55.830 sem fluttu frá Svíþjóð á síðasta ári í Asíu á meðan 10 prósent fæddust í nágrannaríkjum Svíþjóðar á Norðurlöndum. Innan við þriðjungur brottfluttra voru fæddir í Svíþjóð.
Í fréttinni kemur einnig fram að færri Svíar kjósa að reyna fyrir sér í Noregi en oft áður. Áður fyrr kusu margir Svíar að flytja til Noregs, meðal annars í ljósi betri atvinnutækifæra. Frá árinu 2011 hefur Svíum sem flytja til Noregs fækkað um 58 prósent.