Lögreglan á höfuðborgarsvæðinu var kölluð til á fimmta tímanum í dag eftir að tilkynnt var um þjófnað úr verslun í miðborginni.
Í dagbók lögreglu kemur fram að þjófurinn hafi reynt að hlaupa í burtu en starfsmaður verslunarinnar náði að veita honum eftirför. Hinn grunaði var handtekinn og fluttur á lögreglustöð til viðtals.
Upp úr hádegi í dag stöðvaði lögregla ökumann í Hlíðunum vegna gruns um að hann æki sviptur ökuréttindum. Sá grunur reyndist á rökum reistur en í dagbók lögreglu kemur fram að þetta sé í fimmta skiptið sem maðurinn er stöðvaður fyrir akstur án ökuréttinda.
Rétt fyrir klukkan þrjú í dag var karlmaður stöðvaður á Vesturlandsvegi við Suðurlandsveg grunaður um ölvun við akstur. Var hann talsvert ölvaður og þurftu lögreglumenn á vettvangi að meðal annars að styðja hann út úr bifreiðinni og yfir í lögreglubifreiðina. Var hann fluttur á lögreglustöð til blóðsýnatöku og var frjáls ferða sinna að henni lokinni.
Rétt fyrir klukkan 14 í dag var óskað eftir aðstoð lögreglu og sjúkraliðs vegna umferðarslyss við Stekkjarbakka í Breiðholti. Að sögn lögreglu hafði vespu verið ekið í veg fyrir fólksbifreið. Var farþegi á vespunni og hlutu ökumaðurinn og farþeginn minniháttar hrufl eftir að hafa fallið af vespunni. Einhverjar skemmdir urðu á bifreiðinni.
Tvö þjófnaðarmál, til viðbótar við málið sem fjallað er um hér fremst í fréttinni, komu á borð lögreglu í dag, bæði í Háaleitis- og Bústaðahverfi. Annarsvegar var tilkynnt um hnupl úr áfengisverslun en hinsvegar um hnupl í stórmarkaði.
Loks var tilkynnt um eld í leiktækjum við skóla í Breiðholti á fimmta tímanum í dag. Slökkviliðið réði niðurlögum eldsins og varð eitthvað tjón á leiktækjunum.