Slökkviliðsmenn hjá Brunavörnum Árnessýslu í Hveragerði voru kallaðir út vegna elds sem kviknað hafði í gasgrilli við heimahús í bænum.
Á Facebook-síðu Brunavarna Árnessýslu segir að húsráðendur hafi kveikt upp í grillinu. Svo virðist vera sem einhver gömul óhreinindi hafi verið á grillinu eða undir því þar sem eldurinn varð talsvert meiri en til stóð. Húsráðendur voru þó búnir að slökkva eldinn þegar slökkviliðsmenn bar að garði og var tjón óverulegt.
„Af þessu má draga þann lærdóm að gæta þarf þess að þrífa grillin reglulega því í þeim safnast fita sem brennur auðveldlega við réttar aðstæður. Jafnframt er gott er að hafa í huga að fyrsta aðgerð við að slökkva slíka elda er að skrúfa fyrir gasið,“ segir í færslunni.