Hæstiréttur hafnaði í gær kröfu manns um að fá tvær tölvur, flakkara, USB lykla og farsíma til baka en tækin hafa verið í vörslu lögreglunnar frá því í lok mars árið 2014.

Maðurinn liggur undir grun um að hafa afritað íslensku sjónvarpsþættina Sönn íslensk sakamál og deilt þeim með notendum síðunnar Deildu.net. Upplýsingar um hvaða þátt um ræðir hafa verið fjarlægðar úr dómi Hæstaréttar og úrskurði héraðsdóms Reykjavíkur sem birtist hér.

Þáttunum var samtals deilt yfir 90 þúsund sinnum sem síðar varð til þess að framleiðslu þeirra var hætt.

Rannsókn málsins hófst þann 24. febrúar 2014, skömmu síðar var ákærði handtekinn á heimili sínu og eftir húsleit var hald lagt á umrædd tæki. Eftir að kærða var sleppt úr haldi, sama dag, var hann yfirheyrður í þrígang vegna málsins.

Þann 18. maí síðastliðinn fékk hann að vita að rannsókn málsins væri lokið og málið komið í ákærumeðferð. Af þeirri ástæðu og að meira en tvö ár eru síðan munirnir voru haldlagðir krafðist maðurinn þess að fá tækin aftur.

Hæstiréttur hafnaði kröfunni á þeim forsendum að rannsókn málsins sé lokið og ákæra verði væntanlega gefin út á næstum dögum. Viðbúið er að krafist verði í ákæru, upptöku á tölvubúnaðinum, en að öðrum kosti mun varnaraðili væntanlega afhenda sóknaraðila búnaðinn.

Hugsanlegt er einnig, úr því sem komið er, að búnaðurinn verði nýttur við sönnunarfærslu undir rekstri málsins. Sú ályktun verður óhjákvæmilega dregin að krafa sóknaraðila um afléttingu á haldi hafi orðið til þess að ákveðið var að ljúka rannsókn málsins.