Mo segir að steininn hafi tekið úr þegar hann sá stjaksett höfuð – Á yfir höfði sér 25 ára fangelsisdóm
Hann yfirgaf heimahaga sína í Bandaríkjunum til að ganga í raðir hryðjuverksamtakanna ISIS. Fimm mánuðum síðar flúði hann hryllinginn sem fyrir augu bar – loforð um gull og græna skóga stóðust engan veginn.
Maðurinn sem um ræðir heitir heitir Mo og sagði hann bandaríska fréttamanninum Lester Holt sögu sína á NBC News. Í frétt NBC kemur fram að Mo hafi ekki vilja að fullt nafn hans myndi birtast af ótta við hefndaraðgerðir.
Hann segir í viðtalinu, sem birt verður í heild sinni í þættinum Dateline á sunnudag, að steininn hafi tekið úr þegar hann sá stjaksett höfuð sem liðsmenn ISIS höfðu komið fyrir. Eftir að hann kom aftur til Bandaríkjanna var hann handtekinn, en að sögn NBC News hefur hann verið samvinnuþýður yfirvöldum.
„Ég reyndi hvað ég gat að loka á þetta,“ sagði hann um viðbjóðinn sem viðgekkst meðal liðsmanna samtakanna. Mo, sem er 27 ára, var nemandi við Columbia University áður en hann ákvað að ganga í raðir samtakanna. Hann er einn fárra Bandaríkjamanna sem gengið hafa í raðir ISIS.
Í viðtalinu segist Mo hafa heillast að hugmyndafræði ISIS um stofnun kalífadæmis. Hann notaði sparifé sitt til að kaupa sér flugferð til Tyrklands í júní 2014 þaðan sem hann hélt til Sýrlands. Þetta gerðist stuttu eftir að bandaríska alríkislögreglan, FBI, hafði bankað upp á hjá honum þar sem vefsíðurnar sem hann heimsótti þóttu óeðlilegar.
Hann segist hafa laumast yfir til Sýrlands í skjóli nætur og farið beint í æfingabúðir ISIS-samtakanna þar sem nýliðum var meðal annars sýnt sjálfsmorðssprengjuvesti, svo dæmi séu tekin. Hann segist hafa orðið vitni að skelfilegu ofbeldi meðan á dvöl hans stóð. Handtökur fyrir sakleysislega hluti eins og reykingar á almannafæri hafi verið daglegt brauð.
„ISIS stefnir ekki að því að færa út boðskap íslamstrúar um allan heim. Þetta þarf fólk að vita og ég mun halda þessu fram þar til yfir lýkur,“ segir hann. Eftir að hafa fengið sig fullsaddann af ofbeldinu segist hann hafa forðað sér aftur til Tyrklands þar sem hann fór í bandaríska sendiráðið. „Það var mikill léttir. Þegar ég loks komst þangað bað ég þá vinsamlegast um að hleypa mér inn.“
Þegar í sendiráðið var komið var haft samband við FBI og var Mo handtekinn í kjölfarið. Hann ákvað að sýna yfirvöldum fullt samstarf gegn því að sleppa við alvarlega ákæruliði. Hann má þó búast við því að verða dæmdur í 10 til 25 ára fangelsi fyrir að ganga í raðir hryðjuverkasamtaka og starfa með samtökunum. Ef hann hefði neitað að verða samvinnuþýður hefði hann að líkindum hlotið lífstíðardóm.
Mo segir í viðtalinu að markmið hans hafi aldrei verið að gerast hryðjuverkamaður fyrir samtökin. Hann viðurkennir þó að ákvörðun hans um að ganga í raðir ISIS hafi verið sú versta sem hann hefur tekið um ævina. „Augljóslega hefði ég ekki getað tekið verri ákvörðun. Mig langar að beina þeim tilmælum til fólks, sem er í þessum hugleiðingum, að hugsa sig tvisvar um áður en það fer.“
