Slæm færð er um mest allt Suðurland. Búið er að opna veginn um Þrengsli, sem lokaður var fyrr í morgun en Hellisheiði er enn lokuð.

Frá þessu er greint á vef Vegagerðarinnar en þar segir að þæfingsfærð sé víða og sums staðar þungfært en mokstur sé hafinn. Búið er að opna Suðurstrandarveg og verið er að moka á Mosfellsheiði.

Á Vesturlandi eru vegir óðum að verða færir, en ófært er á Fróðárheiði og Útnesvegi á Snæfellsnesi. Upplýsingar vantar um Bröttubrekku. Éljahraglandi er á Vestfjörðum en vegir vel færir.

Hálkublettir eru á vegum á Norðurlandi vestra, raunar þæfingur á Siglufjarðarvegi en verið að hreinsa. Við Eyjafjörð og í Þingeyjarsýslum er hins vegar víða snjókoma, og snjóþekja eða hálka á flestum vegum.

Þæfingsfærð er á Háreksstaðaleið og Fjarðarheiði en verið að hreinsa. Annars er hálka á flestum vegum á Austurlandi, alveg suður í Öræfi.