Söngkonan og samfélagsmiðlastjarnan Camilla Rut, betur þekkt sem CAMY, er móðir, söngkona og þáttastjórnandi vinsæla hlaðvarpsins Bara við.
Camilla var í spjalli við Dóru Júlíu í útvarpsþættinum Radio J’adora og talar þar um hvað hausinn skiptir miklu máli, að hún noti öðruvísi leið að markmiðasetningu. Hún segir það vanta oft í umræðuna um markmið og markmiðasetningu að njóta ferðalagsins en ekki lifa frá markmiði til markmiðs.
„Það virkar ekki fyrir mig að skrifa niður eitt markmið því þá tekur það yfir hjá mér, ég byrja að fresta, kvíðinn tekur við og að lokum feila ég og þá verð ég vonsvikin út í sjálfa mig,“ segir Camilla. „Ég skrifa niður hvað er ég að gera, af hverju er ég að gera það, hvert stefni ég og hvernig ætla ég að fara að því.“
Camilla hefur mikið talað um líkamsvirðingu á samfélagsmiðlum sínum. „Ef ég set mér það markmið að missa fimm kíló og fer á fullt að hreyfa mig og tek mataræðið í gegn, stíg svo á vigtina og fimm kíló eru farin. Er ég bara orðin besta manneskja í heimi þá? Það er ákveðinn ákveðinn ávinningur, en hvað svo? Það vantar oft í þessa umræðu þetta hugarfar að njóta og vera besta útgáfan af sjálfum sér í ferðalaginu.“
Þá segir söngkonan að það sé oft vanmetið hjá fólki að læra að njóta erfiðleikana sem upp koma í lífinu, að heilbrigt sé að sjá erfiði sem leið til að styrkja hugann og leysa vandamálið sem er fyrir hendi.
„Ef eitthvað kemur upp á, þá geng ég í gegnum það. Ég reyni ekki að labba einhverjar krókaleiðir til að komast fram hjá erfiðleikunum, sem ég upplifi að margir gera stundum. Ég verð að viðurkenna allar þessar tilfinningar. Svo lýkur þeim kafla og þá skoða ég hvað ég lærði af þessu. Ég ætla ekki að lifa í stanslausum slag við að beygja mér hjá þessum verkefnum.“