Fjölskylda 14 ára stúlku sem tók eigið líf hefur birt opinberlega síðustu skilaboðin frá henni í von um að þau verði öðrum umhugsunarefni. Rochelle Pryor var af ættum frumbyggja Ástralíu, foreldrar hennar fundu hana meðvitundarlausa í herberginu sínu 2. janúar. Hún lést níu dögum síðar á sjúkrahúsi í Vestur-Ástralíu. Hún er ein af fimm ungmennum af ættum frumbyggja sem hafa tekið eigið líf það sem af er árinu.
Það síðasta sem Rochelle skrifaði var:
„Þegar ég er farin, þá mun eineltið og rasisminn hætta.“
Keyenne, 17 ára systir Rochelle, segir í viðtali að hún hafi verið indæl, lífsglöð og skemmtileg þangað til hún lent í einelti, en meira að segja vinir hennar sneru við henni baki. „Þetta fór mjög illa með hana. Þetta beindist að miklu leyti að uppruna hennar – stundum var þetta bara fólk sem áttaði sig ekki á hvað það lét út úr sér,“ segir Keyenne.
Vinir hennar voru fljótir að koma til hennar aftur eftir að hún var látin, á Instagramveggnum hennar mátti lesa skilaboð á borð við: „Ef ég hefði vitað að þetta væri síðasti dagurinn þinn þá hefði ég gert hvað sem er til að stöðva þig.“