Rúrik Gíslason er sá Íslendingur sem á flesta fylgjendur á Instagram. Hafþór Júlíus Björnsson sterkasti maður í heimi og oft kallaður Fjallið átti þar til í dag flesta aðdáendur á samskiptamiðlinum. Fyrir nokkrum vikum átti Rúrik aðeins 30 þúsund fylgjendur en það breyttist snarlega eftir leik Íslands og Argentínu.
Rúrik er vinsæll á meðal kvenna og ef marka má athugasemdir við myndir Rúriks má ætla að flestir nýju fylgjendanna séu frá löndum Suður-Ameríku. Og þemað í færslunum við myndirnar sem Rúrik birtir er að hann sé þó nokkuð myndarlegri en meðalmaðurinn.
Einn notandi „taggar“ nokkrar vinkonur sína í færslu og segir: „Stelpur, ég fann hann – það er ekki hægt að vera sætari“.
Þegar þetta er skrifað eru aðdáendur Hafþórs 1,309,801 en Rúrik á 1,310,288 og bætist stöðugt í hópinn líkt og sjá má hér.
