Eins og ég talaði um á Snapchat fyrr í vikunni þá var ég að byrja í mömmu-crossfit tímum. Tímarnir eru í Crossfit Reykjavík sem er staðsett í Faxafeni og eru þrisvar í viku. Tímarnir eru ætlaðir verðandi og nýbökuðum mæðrum sem hafa áður æft crossfit. Það er skilyrði að þær sem eru í tímunum hafi lokið grunnnámskeiði í crossfit áður en þær byrja. Þær æfingar sem gerðar eru á námskeiðinu eru hefðbundnar crossfit æfingar en eru þær aðlagaðar að nýbökuðum mæðrum. Þær sem byrja eru í allskonar formi, við erum allar mismunandi staddar eftir meðgönguna og fæðinguna og gerir hver og ein eins mikið og hún treystir sér til. Verð samt að taka það fram að margar sem stunda mömmu crossfit færa sig svo yfir í almenna tíma þegar börnin eldast og halda áfram!

Þetta er frábær leið til þess að koma sér aftur á stað eftir fæðinguna og einnig góð leið til þess að hitta og spjalla við aðrar mæður.
Námskeiðin hefjast ekki á neinum ákveðnum tímum heldur rúllar námskeiðið bara. Námskeiðið er á mánudögum, miðvikudögum og föstudögum kl. 9 á morgnana. Kennarinn sem er með námskeiðið er yndisleg og heitir Sólveig Gísladóttir, ef þið hafið einhverjar spurningar varðandi tímana eða viljið fá að koma og prufa sendið þá á hana línu á solveig@crossfitreykjavik.is.

Mikilvægt er að fara sér hægt og vera meðvitaður um það sem þú gerir á æfingunni. Þú sjálf stjórnar hversu hratt og mikið þú gerir á æfingunni. Konur eru mistilbúnar að fara að æfa eftir fæðinguna og mælt er með því að bíða þar til 6 vikur eru liðnar frá því. Hinsvegar mæli ég með því að ákveða hvenær farið er af stað að hreyfa sig í samráði við ljósmóður eða lækni.

Fyrsta æfingin var erfið en samt ekki jafn erfið og ég bjóst við. Var búin að mikla þetta heilmikið fyrir mér enda ótrúlega langt síðan ég hreyfði mig síðast. Ég fór varlega í allar hreyfingar og var ekki með miklar þyngdir. Ég hlakka ótrúlega til þess að mæta á næstu æfingu og að eyða þessum tíma með stráknum mínum. Ég hlakka til þegar við getum farið að mæta á crossfit æfingar saman fjölskyldan!

Ef þið viljið fylgjast betur með mér þá er Instagramið mitt HÉR.
Snapchat: gabrielalif90

Þangað til næst,
Gabriela Líf <3

Greinin birtist fyrst á Lady.is