Leikkonan Margot Kidder, sem þekktust er fyrir að leika blaðakonuna Lois Lane úr Superman myndunum, er látin, 69 ára að aldri.
Kidder lést á heimili sínu í Livingston í Montana-fylki en þetta staðfestir fréttamiðillinn TMZ sem hafði samband við útfarastofuna Franzen-Davis. Dánarorsök eru enn ókunn að svo stöddu en leikkonan hafði átt ævilanga baráttu við geðhvörf og var mikill talsmaður fyrir bættri geðheilbrigðisþjónustu í Bandaríkjunum.
Kidder reis til frægðar þegar hún lék á móti Christopher Reeve í Superman frá árinu 1978 og fór hún með hlutverk blaðakonunnar í þremur framhaldsmyndum til viðbótar. Leikkonunni brá einnig fyrir í hryllingsmyndunum The Amityville Horror og Black Christmas auk fjölda sjónvarpsþátta og kvikmynda á löngum ferli hennar.
