Í kvöld er ærið tilefni til að fagna því þá munu íslensk börn verðlauna börn allt það sem þeim finnst standa upp úr í menningarlífinu. Þetta er verðlaunahátíð eins og börn vilja sjá hana, fyndin og fjörug – og langar ræður eru stranglega bannaðar.

Á Sögum verða börnin verðlaunuð fyrir verk sín og einnig fullorðnir sem vinna að barnamenningu. Það eru börn á aldrinum 6-12 ára sem sjá um val á verðlaunaverkum fullorðinna.

Verðlaun verða veitt fyrir tónlist, leiklist, sjónvarp og síðast en ekki síst barnabókmenntir. Krakkar á aldrinum 6-12 ára um allt land hafa kosið sitt uppáhald og þau ráða! Á hátíðinni verður einnig afhentur Sögusteinninn, heiðursverðlaun IBBY, auk þess sem ungir rithöfundar, leikskáld og kvikmyndagerðarmenn hljóta verðlaun.

Verðlaunahátíðin sem er í anda Kids’ Choice Awards fer fram í Eldborgarsal Hörpu og hefst kl. 19.30. Frítt er inn á hátíðina en gestir þurfa að sækja sér miða á harpa.is.

Stefnt er að því að gera hátíðina að árvissum viðburði og segja aðstandendur hennar hana setta á sama stall og Eddu- og Grímuverðlaunin.

Hátíðin verður sýnd í beinni útsendingu á RÚV. Að henni standa SÖGUR – samtök um barnamenningu í samstarfi við KrakkaRÚV, SÍUNG, IBBY á Íslandi, Barnamenningarhátíð, Reykjavík bókmenntaborg UNESCO, Borgarbókasafnið, Borgarleikhúsið, Menntamálastofnun, Skóla- og frístundasvið Reykjavíkur og Miðstöð skólaþróunar við HA.