Áhrifavaldurinn Patrekur Jaime er í skemmtiferð í sumarleyfisparadísinni Bendidorm ásamt fjölskyldu sinni. Ferðin tók óvænta stefnu um helgina þegar að Patrekur komst í hann krappan.

„Ég og systur mínar vorum að djamma eitt kvöldið og það var stór maður í mótorhjólavesti merkt einhverju gengi sem var að abbast upp á systur mína. Ég fór á milli og bjargaði henni, en þá byrjaði hann að kalla mig öllum, illum nöfnum,“ segir Patrekur í samtali við DV og heldur áfram. „Ég hrækti á hann og þá tók hann upp hníf. Ég setti hendurnar upp til að verja mig og fékk tvo skurði á handlegginn.“

Við þetta fór maðurinn í mótorhjólavestinu á brott, en meiðsl Patreks voru minniháttar og því leitaði hann sér ekki læknisaðstoðar. Honum var eilítið brugðið eftir árásina.

„Þetta var ekkert hræðilegt en ég fékk smá sjokk fyrst. Nú líður mér vel og þetta var bara ævintýri,“ segir hann. En hugsaði hann sig ekki tvisvar um áður en hann gekk á milli mannsins og systur sinnar til að bjarga henni?

„Nei, alls ekki. Þetta er systir mín.“