Síðastliðinn föstudag grætti söngkonan Taylor Swift fjölmarga aðdáendur sína og fylgjendur á samfélagsmiðlum þegar hún hreinsaði Facebook, Instagram og Twitter reikninga sína, en söngkonan er til að mynda með 102 milljónir fylgjenda á Instagram.

Aðdáendur tóku þó gleði sína á ný á mánudag þegar stutt myndband, svokallaður „teaser“ birtist á Instagram. Töldu margir þetta vísbendingu um að von væri á nýju lagi frá söngkonunni og þegar rýnt er í myndbandið sem sýnir snákshala, má sjá stafina 25, sem aðdáendur töldu klára vísbendingu um að lagið kæmi út á föstudaginn næsta.

Getgátur voru um að lagið myndi fjalla um samskipti Swift og söngkonunnar Katy Perry, en þær hafa átt í illdeilum og á sunnudaginn næsta eru MTV tónlistarverðlaunin sem Perry er kynnir á. Aðrir töldu að lagið myndi fjalla um samband Swift við Calvin Harris, en Swift er einmitt þekkt fyrir að gefa út „smelli“ sem fjalla um sambönd hennar og sambandsslit.

En nú hefur Swift tekið af allan vafa og póstað á Instagram. Nýtt lag kemur út næsta föstudag og ný plata kemur út þann 10. nóvember næstkomandi. Platan, sem er sjötta stúdíóplata hennar, ber heitið Reputation eða mannorð. Og geta þá aðdáendur velt því fyrir sér fram að 10. nóvember hvort að hún mun syngja um sitt eigið mannorð eða sinna fyrrverandi.

Out of the Woods – Harry Styles Swift samdi svo dæmi sé tekið, lagið Out of the Woods, af plötunni 1989, um samband hennar og söngvarans Harry Styles.