Hinn skeleggi þjóðfélagsrýnir og femínisti Camille Paglia var í viðtali við Hollywood Reporter á dögunum og þar tók hún hraustlega til varnar fyrir Playboy-kónginn Hugh Hefner sem lést nýlega. Spurð hvort Hefner hefði verið kvenhatari sagði hún að því færi fjarri. Hefner hefði verið fulltrúi þess karlmanns sem kæmi kurteislega fram við konu og gæfi henni tíma og rými til að samþykkja eða hafna því að vera með honum. Paglia segir hið kynferðislega landslag í kringum Playboy hafa einkennst af skemmtun, ánægju og húmor. Áður hefðu karlatímarit fjallað um veiðar eða hermál. Hefner hefði á snjallan hátt sett kynlíf í samhengi við djass, listir og góðan mat.
Paglia segir barnalegt að femínistar skuli stöðugt tönglast á því að ekki megi líta á konur sem kyntákn. Það sýni algjört skilningsleysi á listasögunni. Listasagan snúist um að hlutgera. Það sé í eðli manna að skapa kyntákn, sem hægt sé að dýrka. Það að breyta manneskju í fallegan hlut verði ekki sjálfkrafa til þess að svipta hana mennskunni. „Þegar við vegsömum fegurð erum að við vegsama lífið sjálft,“ segir Paglia.
