Melinda Rose Woodward, eiginkona velska tónlistarmannsins Tom Jones, er látin. Jones og Melinda höfðu verið gift í tæp 60 ár, en þau gengu í hjónaband árið 1957.

Banamein Melindu, sem alla tíð var kölluð Linda, var krabbamein, en hún var 75 ára þegar hún lést. Í yfirlýsingu sem talsmenn fjölskyldunnar sendu frá sér kemur fram að barátta Lindu gegn þessum illvíga sjúkdómi hafi varað stutt.

Tom og Linda kynntust þegar þau voru 12 ára og giftust þegar þau voru aðeins sextán ára. Þau eignuðust einn son, Mark, 59 ára, en hann starfar í dag sem umboðsmaður föður síns.

Tom Jones stærði sig eitt sinn af því að hafa sængað með 250 konum á einu ári á hátindi ferils síns, en þrátt fyrir að hafa ítrekað sængað hjá öðrum konum sagði hann að hjónabandið stæði styrkum fótum. Tom Jones kom hingað til lands síðasta sumar og hélt tónleika í Laugardalshöll.