Tveggja mánaða dóttir konunnar lést maí
Þriggja barna móðir ráðleggur fólki að hugsa sig vel um áður en það fer í ófrjósemisaðgerð. Konan missti tveggja mánaða dóttur í maí en samhliða fæðingu stúlkunnar, sem var tekin með keisara, lét hún taka sig úr sambandi.
Katherine Lawson, sem er 27 ára, og er búsett í Perth á Bretlandi tók ákvörðunina um að fara í ófrjósemisaðgerð í samráði við eiginmann sinn þegar von var á stúlkunni í heiminn.
Hjónin ákváðu að þar sem þeim langaði aðeins að eiga þrjú börn þá væri ekkert því til fyrirstöðu að annað þeirra færi í ófrjósemisaðgerð. Þá þótti þeim skynsamlegast að Katherine færi í aðgerðina samhliða keisaraskurðinum.
Dóttir hjónanna, sem fékk nafnið Imogen, kom í heiminn þann 23. febrúar síðastliðinn.
„Fæðingin gekk vel og þegar við heyrðum hana gráta í fyrsta skiptið horfðum við á hvort annað og brostum. Á þessu augnabliki vissum við að við værum búin að eignast dóttur þar sem gráturinn hennar var allt öðruvísi en grátur strákanna.“
Þetta segir Katherine í samtali við Daily Mail en þeim grunaði þó að eitthvað gæti verið að barninu þar sem læknarnir í herberginu stóðu lengi yfir henni og skoðuðu hana gaumgæfilega. Þeir sögðu þó foreldrunum að það væri ekkert að óttast.
Í fyrstu töldu læknarnir að Imogen væri með vökva í lungunum svo þeir fóru með hana á barnaspítalann þar sem átti að gera frekari rannsóknir.
Í millitíðinni var Katherine tekin úr sambandi líkt og hún hafði óskað eftir fyrir fæðinguna.
Nokkrum klukkustundum síðar þegar Katherine var búin í ófrjósemisaðgerðinni og komin aftur inn á stofuna þar sem þau höfðu beðið í dágóða stund ákvað eiginmaður hennar, Ben, að fara upp á barnspítalann og athuga stöðuna.
Þar blasti við honum sjón sem hann mun aldrei gleyma. Búið var að tengja Imogen við allskonar slöngur og tæki en lungun hennar höfðu þá fallið saman. Hún gat ekki andað nema með aðstoð öndunarvélar.
Í framhaldinu fengu foreldrarnir þær fréttir að það þyrfti að flytja Imogen á annað sjúkrahús sem væri betur í stakk búið að takast á við veikindi hennar. En hún var sömuleiðis með alvarlegan hjartagalla.
Katherine segir að næstu dagar á eftir séu í hálfgerðri móðu. Á meðan Imogen barðist fyrir lífi sínu reyndi hún að vera til taks á sama tíma og hún var að jafna sig eftir uppskurðinn.
Móðir hennar fékk ekki, sökum sýkingahættu, að halda á dóttur sinni fyrr en hún var orðin tveggja vikna gömul. Þá sat hún með hana í fanginu í 4 klukkustundir. En á þeim tímapunkti var Imogen enn í öndunarvél og batahorfur ekki góðar. Hún lést þann 6. maí síðastliðinn af völdum veikindanna.
Katherine vonast til þess að frásögn hennar verði til þess að fólk hugsi sig tvisvar um áður en það tekur ákvörðun um að fara í ófrjósemisaðgerð, þá sérstaklega samhliða keisaraskurði. „Þar sem við ætluðum bara að eiga þrjú börn og datt aldrei til hugar að eitthvað gæti komið fyrir þau fannst okkur þetta rétt ákvörðun.“
Ef þau ákveða að eignast fjórða barnið, sem Katherine telur líklegt, þá þarf hún annað hvort að gangast undir stóra aðgerð sem gæti snúið ófrjósemisaðgerðinni við, en það eru litlar líkur á að hún heppnist og hún er mjög dýr. Annar kostur í stöðunni er að hún fari í glasafrjóvgun sem er jafnframt mjög dýrt og erfitt ferli.
Hún kveðst í dag sjá mikið eftir ákvörðuninni. „Það er ekki hægt að taka þetta tilbaka og þess vegna ráðlegg ég fólki að bíða því maður veit aldrei hvað gerist næst.“
