Siglfirðingurinn Hallfríður Nanna Franklínsdóttir er hundrað ára gömul í dag. Í Morgunblaðinu segir Hallfríður að hún hafi hvorki borðað heilsufæði né stundað leikfimi á þeim hundrað árum sem hún hefur lifað.

Hallfríður Nanna, sem kölluð er Nanna, fæddist í torfbæ að Litla-Fjarðarhorni í Kollafirði í Strandasýslu þann 12. maí árið 1916. „Hún er alltaf sjálfri sér lík, hún Nanna, tekur sjálfa sig ekki of hátíðlega, kemur til dyranna eins og hún er klædd, er skörp í orðaskiptum, hnyttin, skýr í huga, heldur sínu striki og er bara hún sjálf,“ kemur fram í Morgunblaðinu. Nanna kemur úr stórri fjölskyldu, en foreldrar hennar eignuðust 13 börn. Þrjú þeirra eru enn á lífi.

Aðspurð hvernig heilsan sé, segir hún hana alltaf hafa verið góða. „Ég fór reyndar að eiga erfitt með tal fyrir um þremur árum og mér fannst það leiðinlegt, því ég þarf svo mikið að tala,“ segir Nanna í samtali við Morgunblaðið.

„Ég hef aldrei borðað hollustufæði eða verið í leikfimi eða neinu slíku, hef alltaf drukkið mjólk og borðað súrt og saltað og reykt og mikið af því, þennan kjarngóða mat sem þjóðin ólst upp við í gegnum aldirnar og svo drakk maður mysuna og slátursýruna út í eitt,“ segir Nanna.

„Ég finn aldrei til, hef alltaf verið heilsuhraust í gegnum ævina. Alltaf. Ég er nú hrædd um það,“ segir Nanna að lokum í samtali við Morgunblaðið.