Það er fátt yndislegra fyrir foreldra en sjá barnið taka fyrstu skrefin. Það gefst þó ekki alltaf tími til að fylgjast með barninu hverja stund og geta flestir foreldrar sammælst um hversu erfitt það getur reynst að fá blessuð börnin til að sitja kyrr.

Ungur faðir datt niður á sannkallaða töfralausn eftir að hafa reynt nánast allt til að halda syni sínum uppteknum. Náði hann í stóra plötu. Því næst tók hann saman ýmis konar áhöld og muni sem ungabörn hafa gaman af að handleika, líkt og síma, klósett rúllu og lykakippu, og festi á plötuna. Ekki er hægt að sjá annað á myndinni sem hann birti á samfélagsmiðlinum Imgur en að litli snáðinn sé hæst ánægður með þessa hugmynd pabba síns.

Á meðan sumir munu setja spurningamerki við öryggi hugmyndarinnar þá hefur hún engu að síður slegið í gegn. Hafa notendur síðunnar keppst við að hlaða hugmyndina lofi í athugasemdum og þá hafa nokkrir haft orð á því að hér sé á ferð afbragðs leið til að gera barnið að vélvirkja eða verkfræðingi í framtíðinni.