Félagsleg tilraun var gerð í Bandaríkjunum fyrir skemmstu þar sem tvær konur voru fengnar til að sitja á almannafæri. Önnur konan var með nýfæddan son sinn á brjósti og hin í fleygnum bol sem sýndi brjóstaskoru hennar. Viðbrögð vegfarenda voru vægast sláandi.

Myndbandið var birt á YouTube-rás Joey Salads í gær og hefur vakið talsverða athygli bæði á YouTube og á samfélagsmiðlum á borð við Facebook og Twitter.

Fyrst sést konan með brjóstaskoruna sitja á bekk í verslunarmiðstöð. Margir horfðu hýru auga til hennar og einn karlmaður gefur sig á tal við hana.

Því næst var komið að konunni með barnið. Konan settist á sama bekk og gaf syni sínum brjóstamjólk. Vegfarendur gengu upp að henni og sögðu að það sem hún væri að gera væri „ógeðslegt.“

„Í alvörunni, þarftu að gera þetta hérna. Þetta er ógeðslegt,“ sagði einn sem gekk að konunni á meðan hún var með barnið á brjósti.

Síðar í myndbandinu voru konurnar látnar sitja hlið við hlið á bekk við fjölfarna verslunargötu. Það sama var upp á teningunum þá. Vegfarendur sögðu að brjóstagjöfin væri óviðeigandi og ógeðsleg.

„Af hverju þarftu að gera þetta á almannafæri? Þetta er ógeðslegt,“ sagði ungur maður sem gekk fram hjá konunum.

Stjórnandi tilraunarinnar stóð hjá konunum og sagði við manninn að þetta væri náttúrulegt og eðlilegt. Hann spurði svo hvers vegna honum þætti ekki hin konan, með brjóstaskoruna, ógeðsleg.

„Vegna þess að það er kynþokkafullt,“ sagði maðurinn.

Hér má sjá myndbandið í heild sinni.