Karen Kjartansdóttir, almannatengill og samfélagsrýnir, segir að rapphljómsveitin XXX Rottweilerhunder séu þjóðarauður. Engin hljómsveit hafi gert íslenskunni jafn gott og hún.

„Ég hef verið að vinna að efni um verðmæti íslenskrar tónlistar – bæði menningarlega og efnahagslega,“ segir Karen í færslu á samfélagsmiðlum. „Þegar öllu er á botninn hvolft er niðurstaðan eiginlega sú að engin hljómsveit hefur gert íslenskunni jafn mikið gagn og XXX Rottweiler.“

Hljómsveitin var stofnuð árið 2000 fyrir keppnina Músíktilraunir, unnu hana og slógu rækilega í gegn með samnefndri plötu ári seinna. Á meðal meðlima eru Erpur Eyvindarson, eða Blaz Roca, og Ágúst Bent, títt nefndur Bent. Hafa þeir ávallt rappað á íslenskri tungu.

„Þvílík auðlegð sem tengist þessu bandi – orðaforði, viðhorf, húmor og dýpt,“ segir Karen í færslunni. „Þetta er þjóðarauður.“