Stjórnir deilda og nefnda FKA vörðu tíma með Silju Báru R. Ómarsdóttur rektor Háskóla Íslands í Loftskeytastöðinni fimmtudaginn 2. október síðastliðinn.

„Við vörðum tíma með Silju Báru sem er nýr rektor Háskóla Íslands og það var bæði gefandi og gaman,“ segir Andrea Róbertsdóttir framkvæmdastjóri FKA. „Það er svo mikilvægt að konur sem vinna fyrir félagið og standa í stafni safni sér saman og fái smá dekur. Mjög mikilvægt að þær sjái framan í hvora aðra og nái að tengjast og kynnast betur.“

Einstakt tækifæri til að ræða við rektor og leikkonan Edda Björg með stutta leiðsögn

Silja Bára rektor ávarpaði hóp stjórnakvenna deilda og nefnda félagsins og gafst konum tækifæri til að spyrja rektor spurninga. Einstakt tækifæri til að ræða við rektor um embættið, áskoranir og tækifæri í takt við nýja tíma. 

„Ekki vantaði umræðuefni er kemur að líðandi stundu og áskorunum samtímans: gervigreind, líðan fólks, hraði, vægi menntunar, falsfréttir, heimsmálin, lýðræði, virði starfa og jafnréttismál í víðasta skilningi orðsins,“ segir Andrea. „FKA hefur unnið vel með HÍ og kemst ég ekki hjá því að nefna frumkvöðlahraðal fyrir konur undir merkjum AWE eða Academy for Woman Entrepreneurs sem HÍ og bandaríska sendiráðið á Íslandi hafa tekið höndum saman um síðustu ár. Félag kvenna í atvinnulífinu, FKA og Samtök kvenna af erlendum uppruna koma þar að og verður spennandi að telja í næsta hraðal,“ segir Andrea.

Bryndís Reynisdóttir verkefnastjóri Jafnvægisvogar FKA, sem jafnframt er verkefnastjóri MBA í HÍ, fór stuttlega yfir ánægjulegt samstarf sem hreyfiaflsverkefnið Jafnvægisvogin hefur átt við HÍ. Þess má geta að stórglæsileg Viðurkenningarathöfn Jafnvægisvogarinnar verður haldin í Hátíðarsal HÍ þann 9. október næstkomandi.

Þá bauð stórleikkonan Edda Björg Eyjólfsdóttir upp á leiðsögn um sýninguna og naut hópurinn samverunnar saman.

Sýning um ævi og áhrif Vigdísar Finnbogadóttur

Sýningin Ljáðu mér vængi fjallar um Vigdísi Finnbogadóttur og er í Loftskeytastöðinni, Brynjólfsgötu 5. Sýningin er opin almenningi og þar gefst gestum færi á að kynnast ævi, áhrifum og störfum Vigdísar Finnbogadóttur. Fékk hópurinn sem fyrr segir skemmtilega og fræðandi leiðsögn um sýninguna.

„Fjölbreyttum og skemmtilegum aðferðum er beitt við að miðla merkilegri ævi og hugðarefnum Vigdísar Finnbogadóttur á sýningunni Ljáðu mér vængi í Loftskeytastöðinni,“ segir á heimasíðunni.