Það getur verið dýrt að leggja bílnum í miðbæ Reykjavíkur. Verðið fer líka eftir því hvar þú leggur, en það getur skipt miklu máli eins og ein kona komst að. Hún birti færslu í Facebook-hópnum Vertu á verði – eftirlit með verðlagi.
„Greiddi í dag rúmar 9000 krónur fyrir að leggja bílnum mínum á Hafnartorgi yfir nótt,“ sagði hún og birti með tjákn (e. emoji) sem gaf til kynna að hún væri í léttu áfalli vegna kostnaðarins.
Viðbrögðin létu ekki á sér standa og virtust meðlimir hópsins vera sammála því að það sé orðið allt of dýrt að leggja í miðborginni.
„Það er eiginlega ekki hægt að fara í miðbæ Reykjavíkur lengur,“ sagði einn netverji.
„Algjör sturlun eins og með svo margt annað sem þjóðin hefur látið viðgangast í boði nýfrjálshyggjunnar. Við áttum aldrei að gefa þumlung eftir hvað ókláruðu nýju stjórnarskránna varðar,“ sagði annar.
„Þetta er ekki gjald, þetta er rán,“ sagði einn meðlimur hópsins.
Annar benti á að bílastæðin í Hafnartorgi væru dýrari en önnur bílastæði í miðbænum. „Stæðin á Hafnartorgi og Hörpu eru margfalt dýrari en önnur stæði í miðbænum. Önnur bílastæðahús kosta ekki mikið,“ sagði hann.
Nokkrir meðlimir sögðust vera hættir að fara vestur fyrir Kringlumýrarbraut. Einn sagðist hafa alveg hætt því eftir að Bæjarins Bestu fóru að fást fyrir utan byggingavöruverslanir.
Tímagjald frá klukkan 08:00 til 22:00 er 660 krónur og frá 22:00 til 08:00 er 340 krónur.
Svo til að borga níu þúsund krónur fyrir stæðið þá hefur bíllinn verið yfir nóttina og síðan um átta klukkutíma á dagsgjaldinu (660 krónur).
