Skoski stórleikarinn Gerard Butler greindi frá því nýlega að hann hefði fengið ofkælingu við tökur á Íslandi. Butler hefur verið reglulegur gestur á Íslandi, bæði sem leikari og ferðamaður. Má segja að hann sé sannkallaður Íslandsvinur.
Butler var í viðtali við PEOPLE í tilefni af nýrri kvikmynd, Den of Thieves 2: Pantera. Í viðtalinu greindi hann frá ýmsum meiðslum sem hann, og mótleikarar hans, hafa lent í á ferlinum.
Verst gengu tökurnar á kvikmyndinni 300, sem gerð var eftir samnefndri teiknimyndasögu og fjallar um Spartverjana 300 og orrustuna um Laugaskarð.
„Ég man að á hverjum einasta degi var verið að keyra einhvern á spítala,“ sagði Butler. „Maður var að taka upp bardaga og leit til hliðar og þá var einhver búinn að fá spjót í augað. Svo leistu í aðra átt og þá var einhver búinn að brjóta á sér ökklann. Þetta var klikkun.“
Butler sagðist sjálfur hafa næstum því drukknað við tökur á myndinni Chasing Mavericks árið 2012.
„Ég hélt að þetta væri búið. Þeir þurftu að fara með mig á spítalann og gefa mér hjartastuð. Þetta var svakalegt,“ sagði hann.
Þá nefndi Butler einnig að hann hefði fengið hitaslag við tökur í Montreal í Kanada og hefði ofkælst í sjónum við tökur á Íslandi.
„Ég var heilan dag að taka í íslenska sjónum. Ég fékk beinlínis ofkælingu þar,“ sagði hann.
Ekki kemur fram hvaða kvikmynd var verið að taka upp þegar Butler ofkældist. En hann hefur meðal annars verið hér við tökur á kvikmyndunum Beowulf & Grendel og Greenland: Migration. Þá hefur Butler sést margsinnis á skemmtanalífinu í Reykjavík.
