Hús hinna elskuðu Múmínálfa Tove Jansson er nú risið í Kjarnaskógi, en undirbúningur hefur staðið í nokkurn tíma að hluti skógarins öðlist nýtt líf sem Múmínskógur.

„Mía litla fær nú loks þak yfir höfuðið í Múmínskóginum. Krzysztof verkstjóri hjá Jóhann Helgi & Co ehf. mætti hér í Kjarnaskóg með sína öflugu menn á mánudaginn sem unnu hratt og vel en þeir héldu svo allir heim í langþráð frí nú eftir hádegið hafandi borðað svolítinn hákarl til að herða hugann og þóknast okkur hjá Skógræktarfélag Eyfirðinga,“ segir í færslu félagsins á Facebook.

„Á einungis einni viku reistu þeir Múmínkastalann fyrir Míu sem er afar vel að verki staðið en verkinu er þó hvergi nærri lokið, öryggissvæði og umgjörð öll er næsta mál á dagskrá. Undirbúningur hefur staðið um hríð. Starfsfólk okkar, verktakar og nemendur Menntaskóla Akureyrar hafa komið þar að málum og gaman að sjá gamla, kræklótta síberíulerkilundinn á Kjarnavelli öðlast nýtt líf sem Múmínskógur, sjálfstæð eining innan Kjarnaskógar sem hýsa mun fjölskyldumeðlimi Míu auk annara sögupersóna þess ágæta ævintýris eins og Snorksins og Snorksstelpunnar, Morrans, Hemúlsins, Hattífattanna og svo framvegis. Aðdáunarvert að sjá þessa samhentu harðduglegu fagmenn að störfum og takk fyrir frábærlega unnið verk kæru vinir Krzysztof, Mariusz og Arek.“