Heimildarmyndin Einstakt ferðalag er komin í úrslit á alþjóðlegu kvikmyndahátíðinni ARFF Berlin. Myndin fjallar um hinn unga Ægi Þór sem glímir við sjaldgæfan vöðvarýrnunarsjúkdóm sem nefnist Duchenne. Leikstjóri og kvikmyndatökumaður myndarinnar er Ágústa Fanney Snorradóttir.

Í myndinni er fylgst með Ægi ferðast um Ísland og hitta langveik börn og fjölskyldur þeirra til að veita innsýn í líf barnanna og eiga með þeim skemmtilega stund.

Móðir Ægis, Hulda Björk Svandóttir, segir það þvílíkan heiður að fá þessa viðurkenningu en aðstandendur myndarinnar dreymir um að hún fari sem víðast. Það er þó ekki hlaupið að því að koma mynd á dagskrá risa á borð við Netflix eða Prime.

Hulda skrifar á Facebook:

„Maður þarf helst að þekkja einhvern. Ég get til dæmis ekki sent tölvupóst til að reyna að auglýsa myndina. Það eru margir sem þekkja okkur Ægi orðið og hvað við gerum svo nú langar mig að leita til ykkar og biðja um hjálp. Er einhver sem hefur tengingar í kvikmyndaheiminum til dæmis sem getur tengt mig við einhvern? Þið getið líka hjálpað mér með því að deila. Einstakt ferðalag er mikilvæg mynd og á erindi um allan heim. Við höfum fengið frábærar móttökur við myndinni og ég held að hún eigi erindi um allan heim. Það er svo sérstaklega gaman að segja frá því að RÚV mun sýna myndina í haust á Duchenne-deginum.“

Ægir hefur undanfarin ár staðið fyrir vitundarvakningu um Duchenne og aðra sjaldgæfa sjúkdóma ásamt móður sinni. Hafa þau meðal annars dansað saman á föstudögum til að sýna að það sé alltaf hægt að finna gleðina í lífinu, sama hvað á dynur, þó það sé jafnvel bara í stutta stund hvert sinn.