Tónlistarmaðurinn Benjamín Snær Höskuldsson, úr sveitinni Séra Bjössi, vakti athygli á TikTok um helgina þegar hann bar saman lagðið Þrá sem Tinna Óðinsdóttir flutti í Söngvakeppninni um helgina, og kántrílagið Austin með Döshu sem kom út í fyrra. Benjamín taldi lögin sláandi lík, jafnvel svo lík að lagið Þrá hlyti að vera stolið.
Hann prófaði að blanda lögunum saman og bað fylgjendur sína að dæma fyrir sig.
Tinna hefur nú svarað fyrir lag sitt og segir af og frá að það sé stolið.
„Við stálum auðvitað ekki laginu og værum ekki að keppa í Söngvakeppninni ef svo væri. Laglínan er allt önnur en í Austin-laginu. Það að fólk fái svipuð hughrif við að heyra þessi lög er skiljanlegt en líka mikill heiður því þetta eru tvö frábær lög. En svo er líka til fólk sem heyrir bæði lögin og finnst þau ekki lík.“
Tinna samdi lagið ásamt breska lagahöfundinum Rob Price sem áður hefur samið fyrir Söngvakeppnina. Hann segir að líkindi laganna tveggja séu þau að bæði eru nútímaleg kántrílög. Hins vegar séu laglínurnar gerólíkar.
Tinna tekur fram að teymi hennar láti þessa umræðu ekkert stoppa gleðina og lofar miklu stuði á úrslitakvöldi Söngvakeppninnar næsta laugardag.
„Við munum ekki láta þessa umræðu stoppa okkur í gleðinni og lofum að stíga á svið með frábært atriði og lag næsta laugardag!“
