Leikarinn Armie Hammer hefur nú tjáð sig um ásakanir um að hann sé mannæta, en hann segir þessar furðulegu ásakanir hafa rústað ferli sínum. Hann hefur hingað til haft sig hægan eftir að fyrrverandi kærustur hans, Courtnay Vucekovich og Julia Morrison stigu fram í heimildarmyndinni House of Hammer þar sem þær afhjúpuðu gróf skilaboð sem leikarinn hafði sent þeim þar sem hann talaði um draumóra sína um bindingar, nauðganir og mannát.

Hann ræddi þó um ásakanirnar um helgina í hlaðvarpinu Painful Lessons. „Það voru hlutir sem fólk var að segja um mig sem voru bara galnir.. að ég væri mannæta. Nú þegar nokkuð er liðið get ég litið til baka og sagt að þetta er stórfundið. Fólk var að kalla mig mannætu og allir trúðu því? Hvernig er ég mannæta? Þetta er sturlað, er það ekki?“

Hammer segist þakklátur fyrir allt þetta uppþot í dag. Þegar ásakanirnar komu fram var hann ekki á góðum stað í lífinu. Hann kunni ekki að elska sjálfan sig. Mannætu-sögurnar gerðu út af við feril hans í Hollywood og þurfti leikarinn að horfast í augu við sjálfan sig. Hann lærði auðmýkt og lærði að það skiptir máli hvaða fólk hann hefur í sínu lífi.

„Þetta gekk frá mér. Þetta drap egó-ið mitt. Þetta drap allt þetta fólk í kringum mig sem ég hélt að væru vinir mínir en reyndust þó ekki vera það. Allt þetta fólk lét sig hverfa með hraði,“ sagði leikarinn en tók fram að eftir stóð hann sjálfur og sem betur fer hafði hann enn heilsuna og fyrir það er hann þakklátur.