Það var mikið um dýrðir og margt um manninn við lokaathöfn alþjóðlegu kvikmyndahátíðarinnar í Chicago, enda var þetta sextugasta árið sem þessi virta hátíð fór fram.

Hápunktur athafnarinnar var þegar dómnefndin afhenti verðlaunin í aðalkeppni hátíðarinnar.  Þá var tilkynnt að Elín Hall hlyti verðlaunin sem besta leikkonan fyrir túlkun sína á Unu í kvikmyndinni Ljósbrot eftir Rúnar Rúnarsson.

Elín var að vonum hrærð yfir þessum mikla heiðri og í ræðu sinni þakkaði hún löngum lista fólks sem hafði stutt hana í gegnum tíðina. En sér í lagi, þakkaði Elín samleikurum sínum í Ljósbroti og undirstrikaði að þessi verðlaun væru viðurkenning á frábæru samstarfi þeirra.

Eru þetta áttundu alþjóðlegu kvikmyndaverðlaun Ljósbrots sem hefur verið að fara sigurför um heiminn eftir að hafa hlotið standandi lófaklapp sem opnunarmynd á Kvikmyndahátíðinni í Cannes.  Ljósbrot hefur einnig verið valin í forval til Evrópsku kvikmyndaverðlaunanna og framundan eru fjölda kvikmyndahátíða . Þá hefur Ljósbrot einnig selst vel og mun fara í almennar sýningar um allan heim á næstunni. Myndin gerist á fallegum vordegi þegar líf Unu snýst á hliðina á svipstundu og upphefst rússibanaferð tilfinninga. Þar sem mörkin milli hláturs og gráturs, fegurðar og sorgar, verða stundum óskýr. Með aðalhlutverk fara auk Elínarm Katla Njálsdóttir, Mikael Kaaber,  Baldur Einarsson, Gunnar Kristjánsson og Ágúst Wigum.

„Elín á þessi verðlaun fullkomlega skilið og satt best að segja kemur þetta ekkert á óvart. Við höfum verið að ferðast á milli landa að undanförnu og sama hvert við komum að þá eru áhorfendur, sem og gagnrýnendur, dolfallnir yfir frammistöðu hennar. Chicago er sterk hátíð og hafði kvikmyndir með frábærar leikkonur, á borð við Tildu Swinton, í aðalhlutverkum. Við erum einkar stolt af Elínu og af öllum þeim frábæra hóp sem komu að og gerðu þessa mynd að veruleika,” segir Heather Millard framleiðandi: